امبارح كنت عماله افكر
هجيب ايه لأبو العيال في عيد ميلاده
برفان عنده برفانات كتير لو سرح بيها في العتبه هنكسب دهب
ساعه :) بردو السااعات اللي عندو ممكن من كترها كل واحده تتظبط على توقيت بلد
المشكله ان الوقت أزف ::) مش عارفه ازف كده صح ولا ايه
بس بردو محتاره اجيبلو أيه
بعدين فكرت ففكره حلوه أوي
يوسف أبني الكتكوت مس الداي كاير أو الحضانه
علمتهم يناولو ازاي ماماهتهم لما يكونوو بيعملو كيك
اناا حبيت الفكره أوي
فكرت أن أنا ممكن أصور فيديو مميز وخاص جدا
بحيث اكون بصور نفسي أنا وحبيبي يوسف وحنا بنغني لنورسين عشان تفضل ساكته
ومامي بتعمل الكيك
بحيث أن يوسف يساعد مامي ويناولها الحجات اللي هتبقى حطاها اساسا في طبق واسع
وماعليها غير انها تقول هات يايوسف كذا
فيوسف يجيبهاا
كمان هيبقى منها تنشيط لذاكره يوسف على كلمات الحجات اللي مبيستخدمهاش كتير
وكده أبقى ضربت تلات عصافير بالنبله
قصدي بالحجر
هديه رقيقه لابو العيال
تسكيت ليوسف واستغلال نشاطو
وقضاء وقت اكتر من نورسين من غير زن
طبعا بجانب ان بردو ابو العيال هجبلو بدله حلوه :) وغالبا مهما خبيت الهدايا عشان
نطلعها وقت عيد الميلاد بيقفشها :) فمبتبقاش
مفاجأه
بس المفاجأه اللي تضحك لما يضحك لأنو عارف الهديه من قبلها ويمثل عليا :)))
طبعاً يوسف هيجيب لبابا علاقه مفاتيح حلوه مالفلوس اللي حوشها :)
مهو بيحوش من كتر مابيكوش من العيله
ونورسين الزئنطوطه هتجيب لبابا لعبه يعلقها فالعربيه
وكده حلو اوي عالميزانيه بتاعتي
سـ صلاح ـارا
