رحلة الكابوريا في بيتي متعتبرش رحله للحله ومنها للسفره
ثم ختاماً للمعدة
لاااااااا لاااااااا
رحله الكابوريا هي رحله شاقه جدا
بتبدأ من أول منجيبه عشان نغسلو
حيث أن يوسف باشا الكبير أوي
بيحب جداً يلعب بيه
أه والله يلعب بيه متفاجأين ليه !
انا معرفش ايه بيدور فالقوقعه الحلزونيه اللي أسمها مخو
بس من تقديري أن هو بيفكر نفسه باباي رجل البحار السبعه
بلاش باباي :) عشان ده قديم أوي
المهم انه بيتخيل شخصيه من شخصيات التليفزيون اللي فرقعت فيوزات مخو
وبيعمل نفسو بيصيدها من الحوض :)
وسبحان الله من يرد الروح للمخلوقات بقى
ألاقي كبوريا تحت الدولاب
كابوريا فالغساله
كابوريا فالطبق
بمعني اصح بيبقى أحتلال كابوريوي عالي
والبيت كلو يومها بيتغسل
الغريب أني فكرت أن يوسف هو العاهه الوحيده
وسلمت بالأمر الواقع
:)
لكني أتفاجأت جداً
لما يوسف يلعب بيه ادام نور بتفطس مالضحك
أه والله أنا بذات نفسي امبارح اتصدمت
انا مش عارفه ايه اللي بيضحك فالموضوع بس فعلاً
طلعت الكابوريا مصدر لعب وأكل
شوف سبحان الله أتنين في واحد :)
بغض النظر عن أني مبعرفش أفصصها :)
وبقعد جمب أبو العيال عشان يفصصلي
ومنكرش نظره الأحتقار اللي الواد يوسف بيبصلي بيها عشان مبعرفش أفصصو
لكن أنا افتخر أني حاولت :)
وربطت ايدي لما الكلابات بتعتو غرست فيه
على فكره أنا هفضل مناهضه ضد البتاع ده :) حتى لو كل البيت بيحبو
حتى نورسين أنضمت للجيش اللي بيحبو
أنا ساره أذن أنا ضدو
والسلام على من قرى التدوينه دي وفضل صابر محتسب لحد مخلصها :)
